සංධානේ ඇත්තෝ නායක හිමියන්ගේ ඡන්‍දය මංකොල්ල කයි...

මේක මේ ඡන්ද කතාවක් උනත් එක අතකින් පන්සල් කතාවක් කියන්ටත් ඇහැකි එකක්... මේක ලියන්ට හිතුනේ මේ ඊයේ පෙරේදා මැතිවරණ රාජකාරිය ගැන අපේ ගාමිණී අයියා ලියලා තිබුන මසුරං වටින ලිපිය කියෙව්වට පස්සේ... 

ඒක බලන්ට ඕන අය ‍මෙතැනින් යන්ට...

ඉලෙක්ෂන් ඩියුටි...

හරි අපි එමු අපේ කතාවට...

මේක සිද්ධ උනේ මංතුමා පැවිදි වෙලා ඉන්න කාලේ ඒ පන්සලට හැතැම්ම හත අටක් එහායින් තිබුන පන්සලක... හැතැම්ම හත අට උනත් මොකද මාත් නිතර දෙවේලේ ගොඩ වෙන පන්සලක් ඕක... මොකද ඔය පැත්තේ නිතර පිරිත් දේශනා වැටෙනවා... මාත් ඉතිං පිරිත් වැඩේට ටිකක් තදින් බැඳිලා හිටිය හින්දා ඒ පැත්තේ නිතර කරක් ගහන්ට වෙනවා...

ඔය කතන්දරේ සිද්ධ උනේ අපේ ජේවීපී අප්පුහාමිලා ටික සංධානයක් හදාගෙන සිරි ලංකා එකට හේත්තුව දාපු වෙලේක... මට මතක විදියට ඒ චන්දෙදි වෙන්න ඕන මුලින්ම බුලත් කොලේ චන්ද ලකුණ හැටියට යොදාගත්තේ.. කලින් අත තිබිලා පස්සෙන් පහු අත පුටුව වෙලා..එයිනුත් පස්සේ තමා ඔය බුලත් කොලේ ආවේ... ආන්න ඒ වෙලාවේ තමා මේක උනේ කියලයි මට මතක... 

ඉතිං ඔන්න ඡන්දයක් ආවා... මට මතක හැටියට ඒකත් මහ මැතිවරණයක් වෙන්ට ඕන... කොහොම හරි ඒ ඡන්දෙදී බුලත් අතකුත් අරං ජේවීපී අප්පුහාමිලා කිහිප දෙනෙක් මං වහන්සේ හම්බ වෙන්ටත් ආවා පන්සලට.. කල් ඇතිවම ඡන්දේ දෙන්නේ කාටද කියලා තීරණය කරලා තිබුනත් නිකං ඉන්ට බැරි කම්මැලි කොමට උන්දලත් එක්ක කතා බහට වැටිලා අන්තිමට කට්ටිය ගියේ හිත් නරක් කරගෙන...  හරි ඒ කතා මොටද මෙතනට.. අපි යං කතාවට...

ඉතිං මං මේ කියන පන්සලේ නායක හාමුදුරුවෝ ඒ වෙනකොට බොහෝම වයසයි..ඒ වගේම දුරුවලයි... යන්තං කවුරු හරි වත්තං කොරගෙන තමා එහෙට මෙහෙට එක්ක යන්න හිටං වෙලා තිබුනේ...ඇහීමේ ශක්තිය වගේම පෙනීමේ ශක්තියත් බොහෝම දුරුවල මට්ටමක තමා තිබුනේ...  වයස අවුරුදු අනූ හයක් විතර වෙච්චි කෙනෙකුට ඉතිං ඔය වගේ තත්ව ඒ හැටි අරුමයක් නෙවෙයිනේ... හැබැයි සිහි කල්පනාවනං ඔන්න බොහෝම හොඳ මට්ටමේ තිබුනා...ඒ වගේමයි කතා කිරීමේ හැකියාවත් නරකම නැහැ...

නායක හාමුදුරු නමක් උනත් පන්සල් පහ හයකට විහාරාධිපති උනත් දැන් මේ දුරුවලතා හින්දා උන්නාන්සේ ඒ තනතුරු හොබවන්න ගියේ නැහැ.. තම තමුන්ගේ සිස්සයෝ වෙච්ච හාමුදුරුවරුන්ට ඒ ඒ බලතල පවරලා තමුන්ගේ පාඩුවේ හිටිය කාලේ... ඒත් ඉතිං පිරිතක් එහෙම වෙලාවට කාගෙද කියලා අහලා තමුන්ගේ උවමනාවෙන්ම ඇවිත් අනුශාසනාවක් එහෙම කරන අවස්ථාත් තිබුනා ඉඳ හිට... හැබැයි ඉතිං ඒකට උන්නාන්සෙව වඩම්මන්ට වෙනමම මහන්සියක් ගන්ට ඕන.. ඒත් පළාතේ මිනිස්සු උන්නාන්සේ වැරදිලාවත් වඩිනවා කිව්වොත් බොහෝම කැමැත්තෙන් ඒ සඳහා කටයුතුත් සම්පාදනය කලා...

මේ නායක හාමුදුරුවෝ ඇවිල්ලා බොහෝමයක් පැරණි දේසපාලකයෝ ළඟින් ඇසුරු නිසුරු කරපු කෙනෙක්..කොටින්ම ඩී ඇස් මහත්තයා..ඩඩ්ලි මහත්තයා වගේම බණ්ඩාරනායක උන්නැහේ සහ මැතිණියවත් දැන ඇඳුනුංකං ඇතිව හිටිය කෙනා.. හැබැයි අලියගෙන් තොර ලෝකයක් නැහැ... බණ්ඩාරනායක උන්නැහේ උන්නාන්සෙට බොහෝම උදව් පදව් කරලා තිබුනා උනත් ඩී ඇස්ට තිබුන බැඳීම අවසන් මොහොත දක්වාම අතෑරිය කෙනෙක්නං නෙවෙයි... කෙටි වචනෙන් කිව්වොත් තනි අලියා...

ඉතිං ඔය උන්නාන්සේගේ අලියට ඇති බැඳීම කොයි කවුරුත් හොඳින්ම දැනං හිටියා... ඒත් ඉතිං අනිත් දේවල්වලදී දේශපාලනේ ගාව නොගෙන වැඩ කරන හින්දා කවුරුවත් උන්නාන්සේ එක්ක ඒ පිළිබඳව ආරෝවක් තිබුනේ නැහැ...

ඔහොම ඉන්න අතරේනේ මං කිව්ව මේ ඡන්දේ ආවේ...

වයස හින්දා අමාරු උනත් නායක හාමුදුරුවෝ බොහෝම මනාපයි ඡන්ද මධ්‍යස්ථානයට ගෙහුන් කොහොම හරි අලියට කතිරේ ගහලා තමුන්ගේ වැඩ කොටස කොරලා එන්න.. ඒත් අවුරුදු කීපයකින්ම තිබුන එකම ඡන්දයකටවත් උන්නාන්සේට ඡන්දේ දාන්න වෙලා තිබුනේ නැහැ... මොකද උන්නාන්සේව බාරව හිටිය ඒ වෙනකොට වැඩ බලන විහාරාධිපති උන ධම්මාරාම හිමියන් ජේවීපියට සම්බන්ධකං තිබුන කෙනෙක් වීම නිසා... ඡන්දයක් කිට්ටු වෙද්දී නායක හාමුදුරුවන්ට වෙනදට වඩා බෙහෙත් හේත් ටික එහෙම හොයා සපයලා දීලා වෙනදට වඩා අසනීප ගති වැඩියි වගේ පෙන්නලා ගමන් බිමන් යෑම එච්චරට හොඳ මදි කියලා උන්නාන්සෙට ඒත්තු ගන්නලා ඒ ගමන නොයෙදෙන තැනට කටයුතු කරනවා... ඒ ඇරුනමනං උන්නාන්සේ නායක හාමුදුරුවන්ට බොහෝම හොඳින් ඇප උපස්ථාන එහෙමනං කලා...

තමුන්ව මෙච්චර හොඳින් බලා ගන්න ගෝලයාට පිටින් යන්න ඇති අකමැත්ත හින්දාම නායක හාමුදුරුවන් උනත් ඉවසා වදාරා හිටියා..ඡන්දේ අමතක කරලා... හැබැයි මේ පාර ඡන්දේ වෙලාවේ ගෝල හිමියන්ගේ වටේ හිටිය ඇම්බැට්ටයෝ ටිකක් ලොකු ගැටයක් ගැහුවා... ඒ තමා නායක හිමියන්ගේ ඡන්දය මේ පාර බුලත් කොලේට දම්මගන්න...

ගෝල හිමියනුත් මේ වැඩේ දැන ගෙන හිනා වෙවී බලං හිටියා මිසක් මුකුත්ම කරන්න ගියේ නැහැ... දැන් මේ ප්ලෑනට අනුව අර ගෝල හිමියන් වටේ හිටිය ජේවීපී මල්ලිලා අයියලා ටික පුළු පුළුවන් වෙලාවට පන්සලට ඇවිත් කතා බහ කර කර ඉන්නවා නායක හාමුදුරුවන්ට ඇහෙන්ට...

"මේ පාර අලියා ලකුණ නැහැනේ.. අලියා වෙනුවට මේ පාර තියෙන්නේ බුලත් කොලේනේ..දෙකම කොල පාටනේ... මේ පාර ඉතිං අලියා වෙනුවට බුලත් කොලේට තමා කතිරේ ගහන්න වෙන්නේ.." ආදී වශයෙන්...

නායක හාමුදුරුවොත් දැන් මේ කතා අහ අහ ඉන්නවා මිසක් වැඩි කතාවක් නැහැ..මොකද උන්නාන්සෙට කොහොම උනත් ඡන්දේ දාන්ට යන්ට නොලැබෙන බව දන්න හින්දා... ඔහොම ඉඳලා අවසානෙදී ඡන්ද දවසත් කිට්ටුවට ආවා‍‍‍...

මෙදා පාරත් ඡන්දේ දමන්ට නොලැබෙන වග හිතාගෙන හිටිය නායක හාමුදුරුවන්ට මෙන්න එක පාරටම අවස්ථාවක් උදා උනා කියමුකෝ ඡන්දේ දාන්ට යන්ට... ඒත් අර මෙච්චර දවසක් අහල පහල කතා බහ කොර කොර හිටිය ගොබිලන්ගෙන්ම තමා...

"නායක හාමුදුරුවෝ මේ පාර ටිකක් සනීපෙන් වගේ ඉන්න එකේ කැමතිද ඡන්දේ දාන්ට යන්ට.. ඕනනං අපි එක්ක යන්නං..."

යෝජනාවට නායක හාමුදුරුවෝ කැමති වෙන වග අහන්ටත් දෙයක්යෑ... ඉතිං කට්ටිය වාහනයක් සූදානං කරගෙන නායක හාමුදුරුවන්ව පුටුව පිටින්ම උස්සලා වාහනෙන් තියලා පන්සලේ ඉදන් පේන නොපෙනෙන දුරේ තිබුන ආණ්ඩුවේ ඉස්කෝලේ පිහිටුවා ඇති ඡන්ද මධ්‍යස්ථානෙට වඩම්මං ගියා.. ඒ විතරක් නෙවෙයි ඒ යන ගමන් අර ගොබිලෝ ටික නායක හාමුදුරුවන්ව දැනුවත් කරන්ටත් ගත්තා...

"අපේ නායක හාමුදුරු‍වනේ ඔබ වහන්සේ කාටද මේ පාර දෙන්නේ..?"

"වෙන කාටද ළමයිනේ ඉතිං අලියට මිස.."

"ආ ඒක හොඳයි නායක හාමුදුරුවනේ... හැබැයි මේ පාර අලියා ලකුණ නැහැ කියලා ඔබ වහන්සේට ආරංචි උනාද..?"

"ආ..ඔය වගක් කවුරු කවුරු හරි කතා වෙනවනං මටත් ඇහුනා..."

"ආන්න හරි නායක හාමුදුරු‍වනේ‍‍... ඒ ඇහිච්ච කතා ඇත්ත.. මේ පාර අලියා නැහැ..ඒ වෙනුවට කොල පාටින්ම බුලත් කොලේ තමා චන්ද ලකුණ...ඔබ වහන්සේට තෝරලා ඒකට ගහන්ට ඇහැකි වේවී නේද..බැරිනං අපේ කවුරු හරි එන්නං ඔබ වහන්සේ එක්ක ඇතුළට..ඔබ වහන්සේ එතැන ඉන්න මහත්තයලට කිව්වොත් අපිට එන්ට දෙන්ට කියලා උන්නැහේලා ඒකට අවසර දෙයි... එහෙමනං අපි එහෙම කරමු නේද නායක හාමුදුරුවනේ.."

"හා හා තමුන්නැහේලාගේ කැමැත්තක්..."

හරි දැන් ඔන්න කොහොම හරි ගියා ඡන්ද මධ්‍යස්ථානේ කිට්ටුවට... නායක හාමුදුරුවෝ පුටුව පිටින්ම ඡන්දේ දාන්ට ඇවිත් කිව්වම අනිත් අයත් ගරු සරු ඇතිව අහක් වෙලා ඉඩ කඩ දුන්නා වගේම උන්නාන්සේව ඇතුලට වඩම්මන්ටත් උදව් උපකාර කොලා... හැබැයි...

හරියටම ඡන්ද මධ්‍යස්ථානේ ඇතුලට යනකොටම නායක හාමුදුරුවෝ අහනවා මෙහෙම...

"කෝ මෙතැන රාජකාරිය කොරවන ලොකු මහත්තයා..?"

ඒක ඇහුන ගමන් ඔන්න ඡන්දපොල බාර නිලධාරීතුමා දුවලා එනවා...

"ඇයි ඇයි නායක හාමුදුරුවනේ..."

"මට ඡන්දේ දාන්ට ඕන කරලා තියෙනවා මහත්තයෝ... ඔබතුමාට ඇහැකි නේද මට උදව් කරන්ට..."

"පුළුවනි අපේ හාමුදුරුවනේ..."

"ආ එහෙනං දෙමුකෝ බලන්ට මයෙ ඡන්ද කොලේ.."

කියලා කොහොම හරි අනන්‍යතාවය එහෙම ඔප්පු කොරලා චන්ද පත්‍රිකාව එහෙමත් අතට අරං‍‍...

"ගහන්න මහත්තයෝ මෙන්න මේකේ අලියගේ නැට්ට පැත්තෙන් ලොකු කතිරයක්..ගහලා දෙන්ට මයේ අතට..."

ඔන්න මෙච්චර වෙලා උන්නාන්සේ එක්ක ඇවිත් දත කට මැදං හිටිය ගොබිලෝ ටික කර කියා ගන්න දෙයක් නැතිව තක්බීර් වෙනවා.. උන්දලා හිතං ආවේ වෙනම සෙල්ලමකටනේ... ඒත් ඉතිං දැන් කොහේද ඒවා කරන්නේ... චන්ද මධ්‍යස්ථානේ ප්‍රධාන නිලධාරී තුමා චන්ද නීරීක්ෂණය කරන්න හිටිය අයගේත් කැමැත්ත ඇතිව නායක හාමුදුරුවන්ගේ ඡන්දය අලියට ගහලා දෙනවා.. ඒ වගේම උන්නාන්සේට ඒක ඡන්ද පෙට්ටියට ඔබන්ටත් ආධාර උපකාර කරනවා... දැන් හරි... ඔක්කෝම අහවරයි...ඒ කරලා උන්නාන්සේ මෙන්න මෙහෙම කියනවා...

"කෝ දැන් අර මාව එක්ක ආපු මහත්තුරු ටික.. ඔන්න අපි ඡන්දේ දැම්මා... දැන් ආපහු යං නේද..?"

මොනවා කොරන්ටද... බැහැයි කියන්ටයෑ.. යනකොට හිනා වෙවී ගිය අයියලා ටික මූණූ අකුලගෙන නායක හාමුදුරුවන්ව ආපහු වඩම්මං ආවා.. ඒ ඇවිත් පන්සලට දාලා ගියා ගියාමයි ආයේ නෙවෙයි උන්නැහේලා මතක ඇති කාලෙකට පන්සල පැත්තේ ආවේ... නායක හාමුදුරුවන්ගේ ගෝලයා වැඩේ සිද්ධ වෙච්ච ආකරය දැනගත්තා උනත් සද්ද නොකර ඔහේ හිටියේ තමුනුත් මේකට වැරදි කාරයා හින්දා.. අනික ඕක ආයේ අහලා ඇති වැඩක් ඇතෑ..තමුන් නෙව වැරදි වැඩේ කොරන්ට ගියේ... නායක හාමුදුරුවෝ උනත් ඔය ගැන වැඩි දෙයක් දන්නේ නැතිව ඇති කියලා තමයි උන්නාන්සේ හිතං හිටියේ.. ඒත්.....

එයින් දින කිහිපයකට පස්සේ යෙදුන පිරිත් පිංකමක් වෙලේ අපි දහ දොළොස් නමක් රාත්තිරි කාලෙක පන්සලට එක්කාසු වෙලා  කතා බස් කොරන කොට නායක හාමුදුරුවනුත් කතාවට සම්බන්ධ කරගත්තාම තමා...

"ඒකයෑ මෙදා පාර අපේ ධම්මාරාමත් උන්නැහේගේ ගෝලයෝ ටිකක් එක්ක මටත් ගැටයක් ගැහුවා නෙව... ඒත් ඉතිං උන්දලා කොහේද මාව තම්බන්නේ..."

එහෙම කියලා සිද්ධ වෙච්ච සිද්ධිය අකුරක් නෑර කියා හිටියා... ඒ කියලා අවසානෙදී

"පොඩි උන්නාන්සේලාත් ඕවා ගැන අවබෝධයෙන් ඉන්ට ඕන... ඔය ජාතක කතාවලත්  ඔහොම කතන්දර ඕන තරං තිබුනා... හොඳට හිටිය අලියෙකුත් එක වංගියක් හොරු කණ්ඩායමක් කතා බස් කරපු දේවල් අහං ඉඳලා නොමඟ ගියා... ඒත් ඉතිං මේ අලියා එහෙව් අලියෙක් නෙවෙයි නෙව... අන්තිමට මං උන්දලවම ගොං අලි කරලා කාලෙකට පස්සේ ඡන්දෙත් දාලා ආවා... කන් ඇහෙනවා අඩු මට ඇහෙන තරමටම ධම්මාරාමගේ ගෝල බාලයෝ අලියා ගැන කතා වෙන්නේ මොකද කියලා මං මුළින් කල්පනා කලේ... අනික ධම්මාරාමගේ නඩේ කවද්ද අලියට ඡන්දේ දාන්න මාව එක්ක යන්නේ... මම ධම්මාරාම නැති වෙලාවට පන්සලේ ඇබිත්ත කොලුවට කියලා ටෙලි විසොං එක හයියෙන් දාලා අහං හිටියා ප්‍රවෘත්ති එහෙම මොකදෑ රට තොටේ වෙන්නේ කියලා දැන ගන්ට... උන්දලා කොහේද මේ නාකි අලියව තම්බන්නේ...හෙහ් හෙහ්..."

ධම්මාරාම හාමුදුරුවෝ.. ඒ කිව්වේ නායක හිමියන්ගේ ගෝල නම කර කියා ගන්න දෙයක් නැතිව බලං හිටියා මිස ඒ ගැන එක වචනයක් කතා කලේ නැහැ..හැබැයි අපිත් එක්ක හිටිය නායක හාමුදුරුවරු කිහිපදෙනෙක්ගෙන් කන් පිරෙන්න අහගන්නනං උන්නාන්සෙට සිද්ධ උනා... හැබැයි ඒකෙන් වෙච්ච එකම හොදේ.. එයින් පස්සේ අර පන්සලට ආව ගිය ජේවීපී අප්පුහාමිලා ටිකත් එක්ක ධම්මාරාම හාමුදුරුවන්ගේත් සහ සම්බන්ධේ නැති වෙලා ගිය එක විතරයි... එයින් මෙයින් නායක හාමුදුරුවන්ගේ ඡන්දේ හොරාකන්න ගෙහුං ඒක වැරදුනා විතරක් නෙවෙයි එච්චර කාලයක් බඩගින්න දැනුන වෙලාවට ආවාසෙට ඇවිත් කෙලලා ගිය පිංබත් වේලත් අහිමි කරගන්නයි ඒ අප්පුහාමිලට සිද්ධ උනේ...