මාරයා වලත්තයෙක්ද..?

ඔන්න හොඳ ප්‍රශ්නයක්... ඊයේ දවාලේ මං පෝස්ටුවක් දාලා ටිකක් නිදා ගත්ත අතරේ කවුදෝ මංදා මට කමෙන්ට් එකක් දාලා තිබුනා... මෙන්න ඒක... 

"මේ මාරයා කවුද කියල මම හොයල බැලුව. මම මෙයාගේ හැම පොස්ට් එකක්ම කියෙව්වා. මෙයා ගැන ඇත්ත මම දෙන්නම්. රන්ගි ගැන ඇත්ත නම් රන්ගි මෙයා නිසා ප්‍රෙග්නන්ට් උනලු . රන්ගි කියන්න පුංචි අම්මගේ දුව.. ඊට පස්සේ වෙන මනුස්සයෙක්ගේ ඇගේ එල්ලුව අම්ම. අම්ම ඊ හොයල බැලුවේ නැත්තේ කියල කට්ටිය අහල තිබුනනේ. ඒ අම්ම ගැන ඇත්ත නම් එයට ඒවා ලොකු දේවල් නෙමේ..ගමේම ඉන්න සල්ලි කාරයෙක් එක්ක සල්ලි වෙනුවෙන් බුදියෙන ගනියෙකුට තව මොනවද... මල්ලි කියන්නේ අංක එකේ කසිප්පු ජාවාරම් කාරයෙක්.. මාරයාගේ තව කතා තියෙනවා කවුරු හරි අහල බලන්න.. පිළිකාවක් තිබිල ඔපරේසන් කරලා ඉන්න මනුස්සයෙක්ගේත් පපුව මිරිකලා අතල් ගත්ත පොරක්.. ඇත්ත හොයාගෙන යන්න ඕනි නම් මෙන්න ලිපිනය අංකය හරියටම දන්නේ නැහැ 70 වගේ තමයි හිතන්නේ ඒ හරිය වැව පාර වෑ බඩ"

මං ඉතිං හොදට දපලා බුදියලා ඇහැරිලා මේ පැත්තේ කරක් ගහනකොට මෙන්න මයේ හිතවතුන් කිහිප දෙනෙක් ඒක දැකලා මට දන්වලා තිබුනා... මමත් ඉතිං කලේ ඕක ස්පෑම් ගොඩට යවලා නිකං හිටිය එක.. ඒත් ඕං දැන් ඒක හැම තැනම දාගෙන යනවා කමෙන්ට් එකක් හැටියට... ආයේ ඉතිං ඕවට උත්තර මංම දෙනවා ඇර කාටවත් තියන්න ඕන නැහැනේ...

ඉතිං මේ  කමෙන්ටුවෙන් කාරණා කිහිපයක් කියන්න මේ කෙනා උත්සහ කරලා තියෙනවා..

මාරයා කියන්නේ ටොම් පචය

රංගි මාරයා අතින් බඩ වී ඇත

මාරයාගේ අම්මා නරක ගැහැණියකි

මාරයාගේ මල්ලි කසිප්පු මුදලාලි කෙනෙකි.

මාරයා වලත්තයෙකි

රයිටෝ..ඔය ටිකනේ මූලික කාරණා ටික... හරි ඒ ටික පැත්තකින් තියලා දැන් ආයේ හැරෙමු වෙන පැත්තකට...

මං මේක පියාගෙන එද්දී තැනිත් තැන සඳහන් කරලා තියෙනවා මාරයා කියන්නේ සුදුම චරිතයක් නොවන වග.. හැබැයි මං කලුම චරිතයකුත් නෙවෙයි... කලු සුදු මුසු වෙච්ච අළු චරිතයක්...ඒ තමයි මාරයා... හැබැයි මාරයා කියන්නේ මේ ලෝකෙට පහළ වෙච්ච උත්තමයෙක්වත්..අමුතු සතෙක්වත් නෙවෙයි.. මේ සමාජයේ තවත් එක පුංචිම පුංචි කෑල්ලක් විතරයි... ඒ වගේමයි මාරයා වගේ උන් මේ ලෝකේ තව ඕන තරං ඉන්නවා...අනිත් උන් වගේම මාත් එක මිනිහෙක් විතරයි... දැන් මේ මිනිස්සු කියන ජාතිය සර්ව සම්පූර්ණ දැහැමි ජාතියක්ද..? නැහැ පින්වතුනි... අපි හැමෝගෙම ඇතුලේ කුණු තියෙනවා... අපේ කතාව වටේ කුණු තියෙනවා.. අපේ කතාවල ඉන්න අයගේ කුණු තියෙනවා..ඒ තමා මිනිස්සුන්ගේ හැටි.. ඉතිං මාරයා විතරක් පස්ට කිරි සුදු පොරක්ය කියලා කවුරු හරි හිතං හිටියනං ඒක ලොකු වැරදීමක්.. හැබැයි මාරයාතුමා වෙච්ච මං ඔය කිසිම දෙයක් කවදාවත් නැහැ කියලා නැහැ... ඇත්ත මගේ ඇතුලේ දෙයියෙක් වගේම යකෙකුත් ඉන්නවා.. සමහර විට මං ඒ වග කියලා තිබුන තැන මේ කෙනාට අහු වෙලා නැතිව ඇති...

ඇත්තටම මගේ අරමුණක් තියෙනවා මේ බ්ලොග් එක තුළින් මාරයගේ සම්පූර්ණ ජීවිත කතාවම එළියට දාන්න... ඒ වග අද ඊයෙක නෙවෙයි මං හිතුවේ බොහෝම ඉස්සර කාලෙකදී... ඒ වග මං දන්න කියන කීප දෙනෙකුට මං කියලත් ඇති... ඒ වගේම එහෙම කිව්වම සමහරු මට බොහෝම තදින් බනින්නත් ගත්තා එහෙම කරන්න එපාය කියලා... ඒත් ඉතිං මගේ අරමුණ නරක එකක් කියලා මං හිතන්නේ නැහැ..මිනිහෙක්ගේ ඇතුලේ තියෙන හොඳ වගේම නරකත් එළියට දැමීමෙන් මං බලාපොරොත්තු වෙන්නේ තව කෙනෙකුට ඒ දිහා බලලා තමුන්ගේ ජීවිතේ එක දසමයකින් හරි වැරදි පැත්තෙන් ගලවගෙන හරි පැත්තට ගෙනියන්න තල්ලුවක් දෙන්න... මොකද මට වැරදුන තැන් බොහෝමයි... ඒ වගේම ඒ ඒ කාල වලදී මට ඒ දේවල් වල හොඳ නරක කියා දෙන්න කවුරුවත් හි‍ටියෙත් නැහැ... හුඟාක් ප්‍රශ්නවලදී තනියම කල්පනා කරලා ගත්ත තීරණ උඩයි මම අද වෙනකල් පැවතුනේ... ඒ තීරණ හින්දා මට හරි ගිය තැන් වගේම වැරදුන තැනුත් ඕන තරම් තිබුණා... හැබැයි ඒ හැම එකකින්ම මං පාඩමක් ඉගෙන ගත්තා... එයින් වැදගත්ම පාඩම තමා වරදින්නේ කොහොමද කියන එක... :)

හරි දැන් අර මූලික කාරණා වලට ආයෙම එමු.. එයින් මාරයා ගැන තියෙන චෝදනා වලින් එකක් තමා රංගි මාරයා අතින් බඩ වීම කියන එක.. හනේ එහෙම වෙන්න එච්චර හරියක් කරන්න එපයි... අනික එහෙම උනානං මං හිතන්නේ රංගිව මට බන්දනවා ඇර අපේ ගෙවල්වලින් කෙල්ලව වෙන කොහේවත් එක්ක යන්නේ නැහැ... අනිත් දේ තමා රංගිට අද වෙනකල්ම දරුවේ නැහැ වගේම රංගි අකමැතිම කාරණයත් ළමයි හැදීම... ඕවට ඉතිං උත්තර දුන්නට වැඩක් ඇතෑ...

එතකොට මාරයා කියලා තියෙන්නේ පචද..? ඒකටත් කියන්න තියෙන්නේ කණගාටුයි..මෙච්චර දවසක් කිව්ව හැම දේම ඇත්ත..හැබැයි නංගං ස්ථාන වෙනස් කරලා තියෙනවා..ඒ මගේ ආරක්ෂාව ගැන හිතලා නෙවෙයි අනිත් අයගේ ආරක්ෂාව ගැන හිතලා... ඒ වගේම කිසිම කාරණාවක් වෙනස් කරලා නැහැ..හැබැයි කෙනෙකුට අවාසියක් වෙයි කියලා හිතෙන දේවල් නොකියා ඉන්න පරිස්සම් වෙලා තියෙනවා... ඔය අපේ කතාව කියන එක ලියං එද්දී නෑදෑයින්ගෙන් වෙච්ච හුඟාක් දේවල් මං නොකියා මඟ ඇරියේ ඒවා එහෙම ලිව්වොත් ඒවයින් වඳින්නේ එහෙම කරලා දැනට මිය පරලොව ගිහිං ඉන්න අයට වඩා ජීවත්ව ඉන්න අයට නිසා... නැත්තං ඒ වගේ දේවලුත් ලියලා දාන්ට තිබුනා කිසිම අවුලක් නැති.. ආන්න එහෙම කපා හැරිය දේවල් මිස සත්‍ය විකෘති කරලානං ලියලා නැත මෙතෙක්...

ඊ ළගට වැදගත්ම ප්‍රශ්නය.. මාරයා වලත්තයෙක්ද..? අනිවාර්යයෙන්ම ඔව්... කතා දෙකක් නැතිව මං පිළිගන්නවා මං අංක එකේ වලත්තයෙක්.. මොනවා කරන්නද කන්නේ ඉටිපංදං හඳුන්කූරු නොවුනු කලට... මනුස්ස සරීරයක් ඇතිව උපන් කොට... ඒ සරීරයට හැඟීම් දැනීම දැනෙන කොට... හැකි තාක් ඒ හැඟීම් දැනීම් පාලනය කරගත්තතත් හැම වෙලේම හැම තැනදීම ඒක එහෙම කරන්න බැරි උන තැන් ඕන තරං මගේ ජීවිතේ තියෙනවා.. මං උත්සහ කරන්නෙත් ඒ වගේ තැන් ක්‍රමානුකූලව ලියලා දාන්න... හැබැයි ඔතනදී මං කැමති නැහැ මේක වැල බ්ලොගයක් බවට පත් කරන්න.. ඔය රංගිගේ කතාවේදී උනත් මට තව හිමිහිට ඒක ලියං යන්න තිබුනා... හුගාක් දෙනා පොර කකා කියවන්නත් තිබුනා.. ඒත් කාරණාවට මුල පිරුණු හැටි මිස ඒ දේ කරද්දී මෙන්න මෙහෙමයි කලේ කිය කිය රස කරන්න මට උවමනාවක් තිබුනේ නැහැ... ඉතිං ඒ චෝදනාවට මට කියන්න තියෙන්නේ ඔව් මං වලත්තයෙක්... වලත්තකම් නැති උදවිය මට ඒකට සමා වෙන්ට ඕන හොඳද..?

අනිත් කාරණා දෙක මගේ අම්මයි මල්ලියි ගැනනේ... මං කැමතියි ඒ කිව්ව කෙනා ඒ කාරණා ගිහින් ඒ අය එක්කම විසඳගන්නවනං.. මොකද මං බැඳීලා ඉන්නේ මං ගැන කියන්න මිස අනිත් අය ගැන කියන්න නෙවෙයි... අම්මා උනත්..තාත්තා උනත්..මල්ලි උනත් ඒ අයට ඒ අයගේම ජීවිත තියෙනවා.. ඒවා පාලනය කරන්න හෝ හසුරුවන්න මට හැකියාවක් ඇත්තෙත් නැහැ... එයාලා කරන කියන දේවල් මං සීයට සීයක් දන්නෙත් නැහැ... ඒවා එයාලට අයිති ජීවිත..මේ මගේ ජීවිතේ... මං එයාලගෙන් අහක් වෙලා ඉන්නේ කියලා මේ බ්ලොග් එක කියෝපු ඕන කෙනෙක් දන්නවා... එහෙම තියෙද්දී මට උවමනාවක් නැහැ එයාලගේ දේවල් ගැන කැට තියලා කතා කරන්න...

-----------------------------------

රයිටෝ එහෙමනං මෙන්න දැනට කාලෙකට කලින් ඒ කියන්නේ හරියටම කිව්වොත් 2011/04/28 වෙනිදා මං දන්න කියන නංගි කෙනෙක් එක්ක සිදුකල කතා බහක්... 

-------------------------------------------------------xxxx : අර තිත්ත කථා කවද්ද ලියන්නේ ආයේ me: වෙලාවට ලියන්න ඕන  තාම ඒකට ආවේ නැහැ xxxx : ම්ම් me: ඒවත් එක්කම බ්ලොග් එක ඉවර කරන්නයි ඉන්නේ xxxx: ඒකනේ අවුල  ඇයි ඒ?9:15 AM me: ඒ කියන්නේ xxxx : ඔයාට කවදාවත් ලැබෙන්නේ නැහැ ඔය කථාව ලියලානවත්තන්න me: අද වෙනකොට මිනිස්සු දකින්නේ මගේ හොද පැති විතරයි  ඒත් ඒ ටික ඉවර උනාම  මමම පටන් ගන්නවා  අදුරු පැති ගැනත් ලියන්න  ටිකක් අමාරුයි  මිනිස්සු එහෙම කරන්නේ නැහැ සාමාන්‍යයෙන්9:16 AM ඒත් මං ඒ දේ කරන්න ඒන මැරෙන්න කලින් xxxx ම්ම්  හා me: මම කලිනුත් කියලා තියෙනවනේ  මං ගාව දෙවියයි  යක්ෂයයි දෙන්නම ඉන්නවා කියලා

-------------------------------------------


ඉතිං කියන්න තියෙන්නේ කවුරුවත් වද වෙන්න උවමනා නැත.. ඒ ටික මංම කියන්නං ඉස්සරහට... එහෙම නොකියන්න තීරණය කල දේවල් මා ළඟ නැත... රයිටෝ..එහෙනං ඔන්න මං කැපුනා...   :D