බඩා...(1)

"බඩා" ගැන සිහි කරද්දී මගේ මතකයට මුලින්ම එන්නේ කලු පසු බිමේ රතු පැහැති අකුරු හා හැඩතල කිහිපයක් ඇඳුන තරමක දිස්නයකින් යුතු කවරයක් සහිත ලොකු පොතකින් මගේ කන හරහා ඇඳී ගිය වේගවත් පහරක්ය...

එවකට මා අට හැවිරිදි හෝ නව හැවිරිදි වියේ පමණ පොඩි එකෙකු වූ අතර "බඩා" වයස අවුරුදු දහ අටකට ආසන්න නැඩ තරුණයකු විය... එවන් අයකුගෙන් මා වැනි පොඩි එකෙකු හට වැදුන පහර දරා ගැනීම කිසිසේත්ම පහසු නැත..එහෙත් මා නොවැටී සිටියා මතකය.. ඒ ඇගේ හයියකට වඩා සිදු වූයේ කුමක්දැයි සිතා ගැන්මටවත් නොහැකි වූ නිසාය.. එහෙයින් මා තරමක් විසි වූ මුත් නොවැටී බලා සිටියෙමි... අනතුරුව සිහි උපදවාගෙන කම්මුලත් අල්ලාගෙනම ගෙදර දිවීමි... එයින් පසුව පොලිසි යාමකුත් බඩාට පොලිසියේදී තදින් අවවාද කිරීමකුත් දෙපක්ෂය සමාදාන වීමකුත් විය... ඒ මා සම්බන්ධ කාරණාවකට පොලිසි ගිය ප්‍රථම වතාව විය...

බඩා මට පහර දුන්නේ වෙනකක් නිසා නොව මා ඒ වන විට සෙල්ලම් කරමින් හුන්නේ බඩාගේ බාල මලණුවන් වූ දමින්දයා සමඟ වූ බැවිනි... බඩා පොතකුත් රැගෙන ඔවිට අසලින් යන විට බඩාගේ මලයාත් මමත් තව කිහිප දෙනෙකුත් සිටියේ කුමක් හෝ ක්‍රීඩාවක යෙදෙමින්ය... එක් වරම මලයාව දුටු විට ඕවිට පැත්තට හැරුන බඩා ඌට බැන වඳින්නට වූ අතර වහාම ගෙදර දුවන්නට අණ කලේය... අනිකුත් කොල්ලන්ද තරමක් එහෙට මෙහෙට වූ අතර මා කිසිවක් නොකොට බලා සිටියේ බඩාගේ ගණු දෙනුව ඇත්තේ සිය මලයා සමඟ මිස මා සමඟ නොවන බැවිනි... මා සිටියේ බඩා ගිය පසු ඉතිරිව ඇති අය සමඟ දිගටම ක්‍රීඩාව පවත්වාගෙන යාමේ කල්පනාවෙන් මිස බඩා ගැන කල්පනාවෙන් නොවේ... එහෙත් සිය ගෝරණාඩුවට සිය මලයා පමණක් නොව අහල පහල පොඩි උන් පවා බිය විය යුතුයැයි සිතා සිටි බඩාට මා නොසැලී සිටීම ගැටළුවක් විය... එයට ප්‍රතිචාරය වූයේ ‍අත තිබූ පොත මාගේ කණ හරහා යාමයි... අවසානයේ ‍එය පොලිසියෙන් නිමා විය... ඒ බඩා ගැන මට ඇති අමතක නොවන ප්‍රථම මතක සටහනයි...

කවුද මේ බඩා..?

බඩා යනු කිව යුතු කතා රාශියක් ඇති අමුතුම එකෙකි... පෝසත් කෙල්ලෙකුට පෙම් කල දුප්පත් කොල්ලාගේ චරිතය හෙබවූ අයෙකි... මිනී මැරුමක සැක කරුවෙකි... මැරී ඉපදුන එකෙකි.. ගලේ ගසාවත් මරන්නට බැරි එකෙකි... බේබද්දෙකි... නිතී විරෝධී වැඩ ගණනක නිරත වූවෙකි... උපාසකයෙකි... කරන්න තියෙන හැම දේමත් කල.. වෙන්න තියෙන හැම දේමත් උන එකෙකි... හොඳම දේ නම් අදටත් ජීවතුන් අතර සිටින්නෙකි... එසේ ජීවත්ව සිටීමම පුදුමය උපදවන්නා වූ කාරණයකි...

බඩා යනු එහෙවු එකෙකි... එහෙවු යකෙකි...