ෆුටා හුටා වීම සහ බත් කන හරකෙකුගේ උම්බෑ කීම...

හරි දැන් ෆුටා ඉවරයි. හරි හරි දැන් කෑ ගහන්න එපා ෆුටා ඉවර නැහැ ඒක ලොකු ජයග්‍රහණයක්ය..  ඒක හරහා ලොකු මතවාදයක් ඇති උනාය.. මේක දිගින් දිගටම යන සටනක්ය කියලා... ඒ කතා කොහොම කිව්වත් මේක ලංකාව... මේකේ ඉන්නේ අමුතු මිනිස්සු..හරිනේ... මේ උදවියට ඔයිට වඩා ලොකු දේවල් උනත් අමතක කරන්න ඒ හැටි කල් නොගිය එකේ මේ ෆුටා වගේ එකක් අවුරුදු ගණන් මතක තියාගෙන සටන් කරන පුරුද්දක් ඇත්තේ නැහැ. එහෙම වෙනවනං ඒ වෙන රටක... 

"ඒ රටවල එහෙම උනත් ලංකාවේ එහෙම වෙන්නේ නැහැ..." එහෙම කියන්නේ මං නෙවෙයි ජිප්සීස් නායක සුනිල් පෙරේරා උන්නැහේ... තිස් අවුරුද්දක යුද්ධයක් තිබුනා කියලවත්... ඒ කාලේ කොළඹ බුරුතු පිටින් මිනිස්සු බල්ලෝ බලල්ලු ගානට මරලා දාන බෝම්බ කියලා පුපුරන ජාතියක් තිබුනාය කියලවත් මතක නැති එකේ මේ ෆුටා එකක් ගැන මතක තියා ගන්න අපේ අයට උවමනාවක් ඇති කියලා කවුද කියන්නේ... (ඕනනං ‍ෆුටා සැමරුම කියලා ලබන අවුරුද්දේ පොඩි පාටියක්නං දාතෑකි...) කවුරු හරි එහෙම කියනවනං ඒ කෙනාට මං කියනවා මේහෙම...

"අනේ යන්න ලොක්කා යන්න... අපි නොදන්න මොණරතැන්න..." (ඔය ටික මං කිව්වට තමුන්නාන්සේලා අහන්න ඕන අර පොඩි ළමයා හෙවත් දීපාල් සිල්වගේ වොයිස් එකෙන් හරිය.. එතකොට තමා හිතට වදින්නේ...)

ෆුටා එකට හුටා වීම ගැන මං කතා නොකලට ඔය හැම තැනම දැන් ඒකේ විලාප ඇහෙනවනේ... ඉතිං මං අමුතුවෙන් මොනවත් ඒ ගැන කියන්න ඕන නැහැ... බත් කන හරක්ගේ අදහස් මේ රටේ උගත් උදවියට වැඩක් නැහැනේ... උන් ඉන්නේ බත් කාලා මැරීගෙන වැඩ කරන්න.. එහෙම වැඩ කරලා වෙර වීරියෙන් හොයා ගන්න හැම සතෙන්ම ආණ්ඩුවට බදු ගෙවන්න... එතකොට ආණ්ඩුවේ ඉන්න උන්ටයි.. රටේ ආර්ථිකේ හසුරවනවා යැයි කියන මහා පරිමාණයේ වියාපාරිකයින්ටයි... ආණ්ඩුවේ නිලධාරී පැලැන්තියටයි... එතැනට යන්න දත කන උන්ටයි පැලියාවට කන්න දෙන්න... එහෙම නැතිව බත් කන හරක්ට ඔය වෙන වෙන කතා වැඩක් නැහැ. ඒ ඒ කතා බලා ගන්න උගත් බුද්ධිමත් සුළු කොටසක් මේ රටේ ඉන්නවා නෙව... උන් ඒක බලා ගනී... ඕකනේ කතාව... ඉතිං මොටද මගෙ අදහස් ෆුටා ගැන... මාත් මේ රටේ ඉන්න බහුතරයක් බත් කන හරක් කරනවා වගේ බත් කාලා ඔහේ මාගේ රස්සාව කරගෙන ඉන්නං... රට හදන එක උගත් බුද්ධිමත් ඈයින්ට  බාරයි...

ඒත් කරුමෙට වගේ මගෙත් කට කහනකොට ඔය මොනවා හරි ගොං කතාවක් කියවෙනවමයි නෙව.. මොකද හරක්ට කාලා නිකං ඉන්නම බැහැනේ පොඩ්ඩක් හිමින් හරි උම්බෑ නොකිව්වොත් නිකං මොකක්ද වගේ... ඉතිං මාත් ඔය හිටි හැටියේ ටිකක් හිරි ඇරලා මොනවා හරි කියලා දානවා... මොකද අතක් පයක් යනවා කියලයෑ.. නිකං තියෙන වචනනේ... දැන් ඔය අන්තර්ජාලය හරහා රටේ නායකයින් හදන.. ආගමික ප්‍රබෝධය හදන උන්දලා උනත් ඒ ටික කරන්නේ අත පය හොලවලා පාරට බැහැලෑ... නැහැනේ... කොහේ හරි කොම්පීටර් කට්ටක් ඉස්සරහා වාඩි වෙලා අකුරු වලින් කොටලා නෙව... ඒකනේ අන්තර්ජාලයෙන් හදන නායකයෝ පොලෝ මට්ටමට එද්දී ලොවෙත් නැති වෙන්නේ... හා නැද්ද හොඳයි... (හා හා හිනා වෙලා වට පිට බලන්න උවමනාවක් නැහැ..අපි කවුරුත් එහෙම තමා..ඕකට ලැජ්ජා වෙන්න ඕනයෑ ආයිබෝං... අපි එහෙම තමා...)

ඉතිං ඒ හින්දා මගෙත් නිකං තියෙන වචන වලින් මොනවා හරි දමලා අරින්න එපෑ...

ෆුටා හුටා වීම ගැන මාරයාට ජොලිද කියලා එකෙක් මයෙන් අහපි... නැහැ ඇත්තටම දුකයි... හැබැයි ඒ ෆුටා එකේ හිටිය උන්දලා ගැන නෙවෙයි... රටේ කෙරෙන්න ඕන දේ තිබියදී මේ එක කොනක් අල්ලගෙන ඒකෙන් ප්‍රශ්න විසඳන්න හදන උන්දලා රටේ ඉන්න උන් බත්කන හරක්ය කියලා හිතං ඕක කරේ තියං ගිය එක ගැන... රටක අධ්‍යාපනයට වැඩි මුදලක් වියදම් කිරීම මට ගැටළුවක් නෙවෙයි... මටනං ළමයි නැහැ තමා.. මගේ නිදහස් අධ්‍යාපන කාලෙත් ඉවරයි තමා.. ඒත් මට නැති උනාට අඩුම ගානේ මගේ සහෝදරයට ඉන්න කොලු පැටවු දෙන්නා හරි ඉගෙන ගන්න ඕන ඔය කියන නිදහස් අධ්‍යාපනයෙන්ම තමා... අපි කවුරුත් බයිලා ගැහුවට අපි හැමෝම බලන්නේ ප්‍රශ්නයක තමාගේ පැත්තම තමා... ඉතිං මටත් නිදහස් අධ්‍යාපනය නැති වීමත්.. ඒක දුර්වල වීමත් ප්‍රශ්නයක් තමා.. හැබැයි එහෙමයි කියලා සීයට හයක එල්ලිලා ඔහේ යන්නං වාලේ යෑමෙන් රටේ නිදහස් අධ්‍යාපනයට සේවයක් වෙනවයි කියලා කරුමෙට වගේ මට හිතෙන්නේ නැහැ...

පෙන්නන්න හැදුව අය කොහොම පෙන්නුවත් උඩ තියෙන අයිසිං ටික යටින් පේන්න තිබුන කේක් එක හුග දෙනෙකුට පෙනුනා... මොකද ඒක උස්සං ගිය උන්දලා ටික ගැන ර‍ටේ සාමාන්‍ය ජනයාට යම් තරමක අවබෝධයක් තිබුන හින්දා... 

මෙතුවක් කාලයකට රටේ තියෙන ප්‍රශ්න තමුන්ට ප්‍රශ්නයක් නොවුන ඒ ඒ අයගේ ලෝකවලම හිර වෙලා ඉන්න එක්තරා පෙලැන්තියක් වගේ උන ආචාර්යවරු පිරිසක් ඒ ඒ අයගේ පඩිය වැඩි කරගැනීමේ පෞද්ගලික සටනක් පොඩි සීනි තැවරුමකින් ලස්සන කරලා රටේම ප්‍රශ්නයක් හැටියට පෙන්නන්න හැදුව එක විතරයි සාමාන්‍ය මිනිස්සුන්ට පෙනුනේ...

හා සොරි වේවා... මට අයිතියක් නැහැ රටේ සාමාන්‍ය මිනිස්සු කියලා කියන කොට්ඨාශය මේක දකින එක මෙහෙමයි කියලා කියන්න..  මං දන්නේ මගේ අවට සමාජයේ ඉන්න උදවිය එදි නෙදා කතා කරන දේවල් විතරයිනේ... මගේ අවට සමාජයේ ඉන්නේ වැඩ පොලේ සේවකයෝ... පොලේ වෙළදාං කරන උදවිය කිහිප දෙනෙක්.. (හැමෝම නෙවෙයි මං නිතර බඩු ගන්න සහ පොලේ ගියාම ටිකක් කයියක් ගහන ගමන් බඩු ගන්න අය කිහිප දෙනෙක්) එතකොට කොළ කැඳ විකුණන උදවිය.. වඩේ කරත්ත කාරයෝ... ගරාජ් දෙක තුනක උදවිය.. ටයර් කඩවල සේවකයෝ... හෝටල් දෙක තුනක වේටර්ලා... එළවළු ලෑල්ලක් දාං බිස්නස් කරන  එකෙක් දෙන්නෙක්... ෆෝන් කඩයක් කරන එකෙක්... ගාමන්ට් කෙල්ලන්ට බෝඩිං කාමර දෙන උන්දලා දෙතුන් දෙනෙක්... මෑන් පවර් (ආයතන වලට දවස් පදනමට කුලියට සේවකයින් සපයන්නන්) කාරයෝ ටිකක්... අහල පහල ඉන්න මං වගේම සිකුරුටි කාරයෝ කාරියෝ ටිකක්... ලියවන පට්ටල් කාරයෝ ටිකක්... පොඩි පහේ සිල්ලර කඩ කරන මුදලාලිලා ටිකක්... ඔන්න ඔය වගේ ඈයෝ ටිකක් විතරයි...(අතරින් පතර තව තව උන් ටිකක් ඉන්නවා) ඒ හින්දා මට කියන්න පුළුවන් ඒ අයගෙන් මතු වෙන අදහස් විතරයි.. ඒ ඇරුනු කොට පොදු සාමාන්‍ය ජනතාව කියන බරපතල කොටස මට නියෝජනය කරන්න විදියක් හෝ අයිතියක් නැහැනේ.. ඒ නිසා සමා වෙන්න ඕන... මං ඔය සාමාන්‍ය ජනයා කියලා කොතැනකදී හරි කිව්වොත් ඒ කියන්නේ ඔය මං කිව්ව උන්දලා ගැන කියලා මතක තියා ගන්ට... නැත්තං මං පවුනේ...

ඉතිං මං දකින හැටියටනං ඔය කියන ෆුටා එක අන්තර් ජාලයට හා රටේ සීමිත කොටසකට මහා ප්‍රශ්නයක් උනාට අනිත් වැඩි දෙනෙකුටනං ඕක පරණ පුස්නාම්බුවකට රසයි වගේ පෙනෙන අයිසින් සීනි තැවරුමක් වගේ තමා පෙනුනේ... උන්දලා වැඩි දෙනෙක්ගෙන් 

"කොහොමද සීයට හය..නැගලා යනවා නේද..?" කියලා ඇහුවම මගෙන් අහන්නේ 

"ඔය කියන්නේ අර විස්ස විද්‍යාල ගුරුවරු ටික පඩි වැඩි කරන්න ඉල්ලන එක නේද..?" කියලා මිස රටේ අධ්‍යාපනයකට සීයට හයක් වෙන් කිරීම පිළීබඳව වූ යුගයේ මුළු මහත් ලාංකීය සමාජය උඩු යටිකුරු කරන ලද මහා උද්ඝෝෂනය ගැනනං නෙවෙයි... ඒ අර මං කියන සාමාන්‍ය ජනතාව ඕක දකින හැටි තමා...

දැන් කෙනෙකුට කියන්න පුළුවන්.. මාරයා ආස්සරේ කරන්නෙත් ඌ වගේම බත් කන හරක් ටිකක්නේ කියලා... ඔව් ආයිබෝං ඒකනං එහෙම තමා... මොනවා කරන්නද අහල පහල මං ගැවසෙන තැන්වල උදවිය මිස මට හම්බ වෙනවෑ ලෝක ප්‍රකට උගත්තු... මෙහෙ ඉන්නේ ඉතිං සුද්දන්ට ජංගි මහන්න ඇවිත් කීයක් හරි හම්බු කරං ගමට යන කොල්ලෝ කෙල්ලෝ ටිකක් නෙව.. ඒ ඇරුනම උන්ට කන්න දීලා..බෝඩිං දීලා අනිකුත් අඩු වැඩිය විකුණලා ජීවත් වෙන උදවිය... උන් දන්නවෑ ඔය කියන ලොකු ලොකු දේවල්...

ඉතිං උන්ට මොන අයිතියක්ද ඔය නොදන්න දේවල් ගැන කතා කරන්න.. නේද..? ඕවා කතා කරන්න ඕන ඔය දැන උගත් උදවිය විතරයි නෙව... කොටින්ම උපාදියක් තියෙන්න හරි..හෙට අනිද්දා ලැබෙන්න හරි නැත්තං ඌ කොහොමද රටේ විස්ස විජ්ජාල ගැන කතා කරන්නේ නේද..? ඒකනං එහෙම තමා ආයිබෝං.. ඒත් කරුමෙට වගේ මේ බත් කන හරක් දන්නවා උගත් උදවිය විතරක් කතා කල යුතුයි කියන ඔය සීන් කෝන් එක කොහොම උනත් අවසානෙට ඒ කෙලි හමාර වෙන්නේ තමුන් ජංගි මහලා... බත් තම්බලා... කාමර කුලියට දීලා... කැඳ වීදුරුවක් විකුණලා හම්බ කරන තුට්ටු දෙකට තව බද්දකින් කීයක් හරි වැඩි වෙලා කියන කාරනේ... මොකද ආණ්ඩුව සල්ලි මවලා ඕවා දෙනවා නෙවෙයිනේ... අනික මක් කොරලවත් ආණ්ඩුවේ දැන් ඉන්න සහ..අනගතේ ආණ්ඩු කරවන්න බලං ඉන්න ඔය එක ගොබිලෙක්වත් තමුන්ගේ කුට්ටිය අඩු කරගෙන ඔය කියන සීයට හය අධ්‍යාපනේට දෙයි කියලෑ...

අඩු ගානේ ඔය පෙළපාලි යන්න එක්කාසු උන රනිල් මහතැන් හෙට රජ උනානං දෙයිද සීයට හයක් "මේං පුතේ" කියලා...? එව්වා ඉතිං තම තමන්ගේ පපුවට තට්ටු කොරලා තම තමන්ම විසඳගන්න ඕන පුරස්න.. මං කිව්වට බැහැ... ඒ මදිවට අර වික්‍රමබාහු උන්නැහෙත්.. හා හා ඒ යෝධයා ගැන කතා නොකර ඉමු... මොකටද නේද..?

මං මේ කල්පනා කොරේ ඒක නෙවෙයි ආයිබෝං..තමුන්ට ප්‍රශ්නයක් උනාම විතරමයිනේ අපිට වෙන වෙන අය ගැන හිතෙන්නේ නේද..? දැන් බලමු මේ ආචාරිය මහාචාරියලටත් එහෙමමනේ උනේ... ඉතිං මේ බත් කන හරක් වෙච්ච අපිටත් ප්‍රශ්නයක් ආවොත්නං ඔන්න ඔය කියන උද්ගෝෂණ වලට සම්බන්ධ වෙන්න තිබුනා.. එහෙම නැතිව කාගෙවත් පඩි වැඩි කොරන්න කියලා ටෝක් දෙන්න ගිහිං අපි අපිටම කෙලවගන්නේ මොකටද ආයිබෝං... ඔන්න අපිටත් මොකක් හරි සම්තිං එකක් එන විදියකට යෝජනාවක් ඔය ෆුටා එක අස්සට දැම්මනං අපිත් බොක්කෙන්ම සප් එක දෙන්න තිබුනා.. අර ළමයි ඉන්ටනැෂනල් ඉස්කූල් යවන දීමනා... අර දීමනා මේ දීමනා වගේ... කෝ එකක්වත් නැහැනේ ඒක අස්සේ අපිට හරියන එකක්... බත් කන හරකුන්ට නොමිලේ මාසයකට හාල් මුට්ටයක්වත් කියලා තිබුනනං අපිත් අරින්නේ නැහැ ආයිබෝං... බෙල්ල කඩාගෙන තමා අපි එහෙමනං මේ අධ්‍යපනයට සීයට 6 කියලා මරාගන්නේ... හාල් මුට්ටයක් දෙනවනං අධ්‍යාපනේ හරි වැදගත් දෙයක්නේ නේද මං අහන්නේ...? නිකමටවත් අපිට පුරස්නයක් නැති එකේ අඩු පාඩුව..නැත්තං ඔය ෆුටා එකේ මහතැන්ලට තිබුනා අපේ ප්‍රශ්නෙත් ඔය ලිස්ට් එකටම දාලා අපිවත් ඕකට ඇදලා ගන්න.. කෝ අපිට හරියන ප්‍රශ්නයක් නැහැනේ... ඔන්න වැඩේ...

හප්පට උඩු ඒ කිව්වමයි මතක් උනේ‍‍...

බත් කන හරක් වෙච්ච අපි හුඟ දෙනෙකුටත් ප්‍රශ්නයක් තියෙනවා නෙව... මට ඒක අමතක උනා... ඒක මේ ඒ හැටි ලොකු ප්‍රශ්නයක් නෙවෙයි පුංචි පහේ එකක්... කියන්නත් ලැජ්ජයි ලැජ්ජයි වගේ... ඒත් ඉතිං මොනවා හරි කෙහුරක් කියලා දැම්මම හිත සුද්දයි නෙව...

අපේ පුරස්නේ තමා මේ ක්‍රමේ වෙනස් වෙන්නේ කවදද කියන එක... ඔන්න බලන්න ආයිබෝං... අපිම චන්දේ දීලා යවනවා කට්ටියක් ඉහලට... උන් මොකද කරන්නේ ගිය ගමන් උන්ගේ පඩිය වැඩි කර ගන්නවා... අපිට කෙලෝනවා...

එතකොට තව ටිකකට අපි හම්බු කොරන දේ වියදං කරවලා උගන්නලා යවනවා ඉහලට.. උන් මොකද කරන්නේ.. ඉහලට ගිය ගමන් පහල තියෙන ඉනිමගට පයින් ගහනවා... ආයේ අපේ එකෙකුට ඒ දිගේ උඩට යන්න බැහැ... ඒ විතරක්යෑ...එතැන් පටන් උන් පටන් ගන්නවා උන්ගේ කුට්ටිය ලොකු කරන්න කියලා කෑ ගහන්න... උනුත් වැඩි කරගන්නවා.. ඒක උන් වැඩි කරගන්නේ සීට්ටු කොරමෙට... ඔන්න එක කොටසක් පටන් ගත්තමා අපිට වැඩි කුට්ටිය දියවු කියලා... ඒක දෙනවා ආණ්ඩුව.. මොකද උන්ට ‍අතින් පයින් යනවෑ... ඒක දීලා අහවර වෙද්දීම අනිත් පැත්තෙන් ටික දෙනෙක් පටන් ගන්නවා..උන්ට අච්චරනං අපිට මෙච්චර දියවු කියලා... දැන් ඉතිං ඒකත් දෙනවා.. ඒක දකින අනිත් උන් ටිකකුත් කෑ ගහනවා දිපියවු අපිටත් මස් රාත්තලක්ම කියලා.. අනේ ඉතිං උන් එය ඔය විදියට බෙදාගන්නවා... බත් කන හරක් වෙච්ච මේ පැට්ටේරියක කඹුරන අපි මොනවා කියලද කෑ ගහන්නේ... අද කෑ ගැහුවොත් හෙට දොට්ට... ඕනනං අපිත් එක්ක කෑ ගහන්න රනිල් අයියා හරි වික්‍රමබාහු හරිත් එයි... ඒත් ඒ ඇවිත් මල්ල පුරවං ගිහිං පහුවදාට අර ටිකම කරයි... අපිට මොන ආශ්චර්යද..?

මොන දේ කොහොම උනත් අපිට මේ ක්‍රමේ වෙනස් වෙන්නේ නැති එක ගැනනං ලොකු පුරස්නයක් තියෙනවා... ඇත්තටම කිව්වොත් මේක වෙනස් කරන කොරමයක් ගැන හිතා ගන්න බැරි එක තමා අපේ පුරස්නේ... ඒක එක රැයින් විසඳන්නනං එන්න අපිත් එක්ක පා ගමන් යන්න.. විරෝධතා කරන්න කියලා කියන්නනං ඕන තරං කට්ටිය ඉන්නවා... ඒත් ඔය කෑගහන එක උත්තමයෙක්වත් වෙනස් කරපියවු කියලා කෑ ගැහුවට ඒක කරන විදියක් කියන්නේම නැහැ නෙව... හරියට අර රතුපාට කට්ටිය වගේ... (උන්දලත් ඉල්ලනවා විතරයිනේ.. කරන හැටි රහසක්නේ...)

එහෙම කෑ ගහන්නනං මේ බත් කන හරක් වෙච්ච අපිටත් බැරියෑ... ඒත් අපිට නැති ඔය උගත් වියත් මහාචාරියලට ඇහැකි නේද මේකට ටක්කෙටම හරියන විසඳුමක් හදලා කියන්න.. නිකං මහින්ද අයියා පළාත් සභා චන්ද තියන්නැහේ අතන එකයි මෙතන එකයි සැරෙන් සැරේ තිය තිය ඉන්නවා වගේ ඒ ඒ අයගේ කුට්ටිය වෙනුවෙන් විතරක් කෑ මොර දෙන එක නවත්තලා පොදු වැඩකට එන්න... මොකද දැන් ඔය තියෙන වියවස්ථා අරක මේක අණ පනත් හැදුවේ අපිද..? අර පාර්ලිමේන්තුවට අපි දක්කපු උන් එක්ක එක්කාසු වෙලා ඕවා හැදුවෙත් ඔය උගත් මහත්තුරුම නේද..? අපිට ඉතිං දක්කන්න ඉන්න එකම හරක් සෙට් එකක් හින්දා ඒ ඒ කාල වලට අවුලක් නැහැ කියලා හිතෙන සැට් එක යවනවා ඇර මොකද තාම අර කියන දියසේන කුමාරයවත් ඇවිත් චන්දේ ඉල්ලුවෑ.. අඩු ගානේ රාවණවත්.. හම්මේ...රාවණා...මට කිය කිය හිටිය ඒවත් අමතක උනා...

කරුණාකරලා පින් ඇති උගත් වියත් මහත්තුරුනේ... ඔබ තමුන්නාන්සේලා අරකට මෙච්චරයි මේකට මෙච්චරයි කියලා කෑලි වෙන් කර ගන්න දඟලන්නේ නැතිව මුළු රටටම හරියන වැඩ පිළිවෙලක් හදන්න... ඒක හදද්දී දැනට තියෙන ක්‍රමය අස්සෙන්ම උඩට ඇවිත් ඒක ක්‍රියාත්මක කරන්න පුළුවන් විදියට ඒක හදන්න.. හරියට අර මඩ යට ඉඳන් ඒ මඩ එක්කම සටන් කරගෙන මතු වෙලා දිය හරහා ඇවිත් දිය මතුපිට පිපෙන නෙළුමක් වගේ දෙයක්.. එහෙම නැතිව පැරිෂුට් ක්‍රමයක් නෙවෙයි... දැන් කෙනෙක් කියයි අහවලාට දෙන්න එයා ඇවිත් විධායක කොරමේ වෙනස් කරලා අපිට දෙයි මඟුල් මේසේ ඇරලා කියලා... අපි නොදන්නවෑ ඒවෑ තරම... අර එක්කෙනෙක් දහ දාහකින් පඩි වැඩි කොරන්නත් කතා කලේ එක වංගියක්... ඒත් ඉතිං ඒ දහදහාට වඩා අනිත් පැත්තෙන් දෙන්න හදපු එයින් බාගෙටද කොහේද රට ගියේ නිකංයෑ... 

ඒ වගේ මූ වෙනුවට අරූ කියලා ක්‍රම නැතිව හිතලා බලලා කල්පනා කරලා හදමුකෝ ක්‍රමයක් මේ තියෙන කොරමේ තුලින්ම මතු කරලා අරං ක්‍රමය වෙනස් කරවන අර පරිගණක වෛරස් එකක් වගේ තියෙන පද්ධතිය කාලා දාලා අළුතින් ලියවෙන එකක්... මට ඕවා වැඩිය පැහැදිලි කොරන්ට තේරෙන්නේ නැහැ ආයිබෝං..බත් කන හරකෙක් මෙහෙමවත් කතා කොරනව මදෑ නේද..?

අපිට ඕන දැන් තියෙන එක එකාට උවමනා විදියට ඒ ඒ කාල වලට වෙනස් කරන ක්‍රමය නැතිව කවදත් මොකා ආවත් වෙනස් කල නොහැකි හිල් නැති පාලන කොරමයක්... ඒකේ ඇතුලේ අසීමිත බලතල තියෙන නායකයෝ ඕන නැහැ... බුරුතු ගණන් ඇමතිලා ඕන නැහැ... අත්සන් ගහන්න විතරක් ඉන්න නිලධාරී ඕන නැහැ... කොටින්ම බත් කන හරක් විසින් නඩත්තු කරන පිං ගොන්නු නැති ක්‍රමයක්... දැන් වෙලා තියෙන්නේ ඒකනේ... දේසපාලුවගේ ඉදලා ආණ්ඩුවේ රස්සාවල් කරන හුග දෙනෙක්ගේ තත්වේ අපෙන් ණයට කන පිං ගොන්නු වගේනේ... උන් උන්ට හිතු හිතු වේලාවට වැඩ වර්ජනය කරලා අරක දියවු මේක දියවු කියලා කෑ ගහන්නේ උන්ට උගන්නන්න දහදිය හලපු අසරණ මිනිස්සුන්ව උගසට තියලනේ.. උන් ඔය කෑ ගහන්නේ තවත් අපේ තුට්ටු දෙකට කෙලවන්න මිස අපිට දෙයක් දෙන්නයෑ... 

දැන් ඔය ෆුටා එකෙත් කට්ටිය අරක මේක ඉල්ලුවා උනාට ඒ දේවල් ලැබුනොත් එයාලා විසින් දැනට කරනවට වඩා මිනිස්සු වෙනුවෙන් කරන වැඩ ගැන තිබුනද ආයිබෝං..? එහෙම නැත්තං වෙනදා වගේම ඔහේ සුපුරුදු චරියාවන් ටික කරගෙන යනවට තව වැඩියෙන් දෙන්න කියලා කිව්වද..? ඇත්තටම මං දන්නේ නැහැ... ඒකයි අහන්නේ... නැත්තං ඉතිං වෙන්නේ එයාලා පඩි වැඩි කරගනී... එයින් පස්සේ එයිට පහල උනුත් ඒකම කර ගනී... ඕනනං දැන් සීයට හයක්ම තියෙන එකේ තව රස්සාවල් ටිකක් දෙමු කියලා අර කලා උපාධි කරලා අවුරුද්දෙන් බාගයක් පාරේ කෑ ගගහා යනවා මිස තමන් ගත්ත උපාධියෙන් වෙන කරන්න දෙයක් ඇත්තේම නැතිව වගේ හැසිරෙන උදවියට අධ්‍යාපන අංශයේ රස්සා ටිකක් මවලා හරි දෙන්න ඇමතියා ලෑස්ති වෙයි.. 

ඇයි රස්සා කියන්නේ තමන්ගේ උන් ටික ගොඩ දාන්නත් තව කීයක් හරි හොයා ගන්නත්..චන්ද ගොඩ වැඩි කරගන්නත් පොටක්නේ.. ඕනනං ඔය "අධ්‍යාපන සංවර්ධන සමෘද්ධි නිලධාරී" වගේ ලේබලයක් ගහලා අතිරේක/නියෝජ්‍ය/ සහකාර වගේ එක එක අනං මනං සුකුරුත්තං ටිකක් ගහලා කට්ටිය ගන්න බැරියෑ... එහෙම ගත්තත් ඒ ටිකත් යන්නේ සීයට හය ඇතුලේමනේ... ඔව්වනං කියන්න බැරියෑ ගමකට... ආන්න ඒ වගේ කෑලි කුට්ටි ක්‍රමයක් නැතිව රාජ්‍ය සේවය වැඩක් ඇති මට්ටමකට ගේන ක්‍රමයක් හදමුකෝ... එතනදී රාජ්‍ය සේවකයා විරුද්ධ නොවී එකඟ වෙන මට්ටමට යෝජනා හරි ගස්සන්න මතක තියා ගන්නත් ඕන.. නැත්තං ඕවා කොහොම හැදුවත් කිරියාත්මක වෙන්නේ නැහැනේ...

ඔය උගත් උන්නැහේලා පුළුවන්නං කරන්න ඔය කියන දේ... ඒ කියන්නේ අපිටත් පිළිගත හැකි... පක්ෂ දේශපාලනයට යටත් නොවුන පොදුවේ හැම කොටසකටම අසාධාරණයක් නොවන ආණ්ඩුක්‍රම ව්‍යවස්ථාවක්.. ඒක කිසිම ආකාරයකින් ක්‍රියාත්මක වීමට බාධා කල නොහැකි අන්දමේ නීති මාලාවක් ඇතුළුව හිල් නැති සිස්ටම් එකක් අපිට දෙන්න... 

ඒක අර ජී ඇල් පීරිස්ගේ මහප්‍රාණ නැතිව සරලව සාමාන්‍ය මිනිස්සුන්ට කියවා තේරුම් ගත හැකි කොරමයක් වෙන්න ඕන... පැහැදිලිවම ඒ හදන ක්‍රමය ක්‍රියාත්මක නොකර බැරි තත්වෙට එන විදියට ඒක නිර්මාණය කරන්න... එහෙම කරලා මේ බත් කන හරක්ට ඉදිරිපත් කරන්න... එදාට බත් කන හරක් ඒකට එකතු වෙයි.. එහෙම නැතිව අරයගේ අර කෑල්ල කඩා ගැනීමේ සටනටයි.. මෙයාගේ මේ කෑල්ල කඩා ගැනීමේ සටනටයි මේ හරක්ට කතා කරන්න එපා... අපිට ඒවට වෙලාව නැහැ.. අපිට තියෙනවා අපි බත් කන ගමන් ඔහෙලටත් බත් කවන්න හම්බු කොරන්න... ඒ අස්සේ ඔය විහිළු කර කර ඉන්න අපිට වෙලා නැහැ...

අපි තමුන්නාන්සේලාගෙන් ඉල්ලන්නේ එහෙම අපිවත් අරං ගොඩ යන වැඩ පිළිවෙලක් හදන්න කියලයි... එහෙම අපි ඔක්කෝම ගොඩ ගිය දවසකට ඔහෙලට ඔහෙලගේ වටිනාකමට ගෙවන්න අපි විරුද්ධ වෙන්නේ නැහැ... ඒ වටිනාකම හදාගන්න එක ඔහෙලගේ අතේ තියෙන දෙයක්... කැමතිනං කරන්න... අකමැතිනං නිකං ඉන්න.. අපිට බත් වෙනුවට පිදුරු කව්වන්න එන්නේ නැතිව... ඒ හරක් අපි විකුණලා හුඟක් කල්...

හා මං නැවතුනා... ෆුටා හු‍ටා බැරිනං ඕන වෙඩිමක් වෙද්දෙං... අපිට පාංද..? නැහැ අපිට පාංවත් නැහැ...