පාලොස් අවුරුද්දක දොළදුක් කෑම...

ඕක කිව්ව ගමන් ඉතිං කට්ටියටම කල්පනාවට එන්නේ එකම කාරණයයි නෙව... ඒ කිව්වේ ඉතිං බඩදරු අම්මලාට බඩින් ඉන්න කාලෙට ඇති වෙන ලොවෙත් නැති කෑම ජාති ගැන ඇතිවෙන ආසාව නෙව... ඔය දොළදුක් කෑම ගැන වංගියක් අපේ කට කහන දුමී අයියා ලියලා තිබුනා කියලා මට මතකයි... ටිකක් හොයලා බැළුවනං හොයා ගතෑකි... ආයේ ලින්ක් හොයන්න යන්න කම්මැලියි බොලවු...

ඉතිං මේ හදිසියේ දොළදුක් කෑමක් ගැන මොකක්ද මට තියෙන කතාව කියලා බලන අයත් ඇති නෙව... (ඔව් ඔව් බබා හම්බ වෙන්න කිට්ටුයි.. වරෙවු කෑම අරං.. :D ) ඇත්තම කිව්වොත් මේක මේ හරිම වචනේ දන්නේ නැති කොමට දාපු මාත්තුරුකාවක්... දැන් ඔය ගෑණු උදවියට ඔය දොළ දුක් ගාය හැදෙන්නනං ඉතිං බඩ දරු වෙන්නම එපැයි... (හා හා මං දන්නවා.. උන්දලට බඩ දරු නොවුනත් ඉතිං කවුරු හරි ගෙනල්ලා දෙන්න එකෙක් ඉන්නවනං අවුරුද්දේ තුන්සිය හැට පස් දවසෙම උනත් දොළදුක් තමා.. මං කිව්වේ ඒ ගැන නෙවෙයි...) ඉතිං එහෙම බඩ දරු නොවී උන්දලට මොනවා හරි කෑමක් කන්න ආසාවක් ආවොත් ඒකට කියන නියම නම මොකක්ද..? ඇයි එතකොට කෑම ජාතිවලට ආලේ හිතෙන්නේ උන්දලට විතරද..? ඇයි අපි ඔටුවොද..?

මට ඇත්තටම දැන ගන්න උවමනා වෙලා තියෙන්නේ මේ අහිංසක අපි වගේ උදවියට ඔය කෑමක් බීමක් ගැන අප්පරමාණ ආසාවක් ආවොත් ඒකට කියන නම මොකක්ද කියලයි... දන්න එකෙක් සිටී නං කියමු බලන්ට...

ඉතිං මෙච්චර වැල් වටාරං ගැහුවේ වෙන කෙංගෙඩියක් ගැන කියන්න නෙවෙයි.. මගේ දොළදුකක් (හරි වචනේ ලැබෙනකල් ඒක තමා පාවිච්චි කොරන්න වෙන්නේ) සංසිඳුවා ගන්න හැකි වීම ගැන තමා ඕං...

මාරයාතුමා වෙච්ච මංතුමාට හරි අපූරු බාල සංධියක් තිබුනා.. දුක් කරදර රාසියක් තිබුනා උනත් ඒ හැමටමත් වඩා අපූරු තාලෙට අපි ජීවත් උනා... සමහර දේවල් සල්ලි කොච්චර තිබුනත් කෙනෙකුට ලැබෙන්නේ නැති දේවල්... එයින් සුපිරිම එක තමා අපේ තාත්තාගේ උයන පිහන කෑම වල තිබුන දිවිය ලෝක රහ... ඒ දේ ලේසියෙන් ලැබෙන්නේ නැහැ කෙනෙකුට... අපි අර කතාවට කියනකොට කියන්නේ “මොනවා නැතත් අම්මා අතින් හදන කෑම ටික තරං වෙන කිසිම දෙයක් රහ නැහැ“ කියලා නෙව... එහෙම කිව්වට මොකද මංනං එහෙම කියන හුග දෙනෙක් අම්මා හදන කෑමවලට වඩා කඩවල් වලින්.. යාළු මිත්තරයින්ගේ ගෙවල් වලින්.. එහෙම කොටා බාන්ට කැමතියි කියලා දන්නවා... මොකද මටත් එහෙම යාළු මිත්තරයෝ කිහිප දෙනෙක්ම උන්නා.. උනුත් කියන කොට කියන්නේ “අම්මාගේ කෑම තමයි කෑම“ කියලා.. ඒත් අම්මා උයන කෑම එක මග ඇරලා හිමිහිට ගිහිං වෙන තැන්වලින් කන උන් ඒ අතර එමටයි... ඇත්තම කිව්වොත් ඉතිං ඔය කියුං බොහෝමයක් කියුං විතරයි නෙව...

අනේ ඉතිං කවදා කවුරු කොහොම ඇහුවත් මංනං කියන්නේ අම්මාගේ කෑම නෙවෙයි මටනං තාත්තාගේ අතින් උයන කෑම තමා වැඩි රස... හැබැයි ඒ වගේම මං කඩවල් වලින් කන්නත් රුසියා... ඒත් පිටස්තර ගෙවල් වලින් කෑමට ඒ හැටි මනාපයක් නැහැ....

ඉතිං මේ හදිසියේ තාත්තාගේ කෑම ගැන ලියන්ට හිතුනේ මේ දවස්වල බ්ලොග් අවකාසේ රැල්ල ගහන්නේ කාපූ බීපූ කෑම බීම ගැන හින්දාම නෙවෙයි... (ඔව් ඔව් අර එකෙක් මොනා ලිසාව පෙන්නනවා කියලා හතර අතේ බතුයි පානුයි ඉඳි අප්පයි අරකයි මේකයි අපිට ගිල්ලෝන කාරනේවත්... අපේ කාකාතුමා බයියං කෑව කාරණේ හින්දවත් එහෙම නෙවෙයි... අනික ඉතිං මේ බ්ලොග් අස්සට කෑම ජාති දාලා මං තරං බැනුං අහපු එකෙක් නැති හින්දා මට මොන තහංචිද..?) මේක මේ වෙනම කාරණාවක්...

හදිසියේම මරණයක් වෙලා මට ගිය ඉරිදා දිහාවේ අපේ ගෙවල් පැත්තේ ගෙහුං එන්ට උනා... කර ගාවට වැඩ ගොඩ ගැහිලා තියෙද්දී උනත් නොගිහිං බැරිම අවස්ථාවක් හින්දා හදිසියේ ගෙහුං එද්දී අපේ ගේ පිටිපස්සේ බිලිං ගහේ ගෙඩි හැදිලා තියෙනවා දැකලා එයින් ටිකක් නංගිට කියලා කඩෝගෙන ආවේ මේ පාරනං උයනවා උයනවා උයනවාමයි කියලා හිතලා... දැනට සති කිහිපයකට කලින් ගෙදර ගිය වෙලේත් හැදී ගෙන එන බිලිං ගැට ටිකක් කඩං ආවා උනත් ඒක කරෝල හොදි වලට දාලා කෑව ඇර මාළුවට උයන්න උනේ නැහැ නෙව...

ඔය බිලිං මාළුව ගැන කිව්වාම සමහරුනං කියන්නේ “කජු බිලිං“ තමා හොඳම කියලයි.. සමහරු “කජ්ජ බිලිං“ කරලත් උයනවා කියනවා.. අනේ ඉතිං අපි ඒවා කොරන්න යන්නේ නැහැ... පැරණි විදියට බිලිං ටික උයා පිහා ගන්නවා ඇර...

බිලිං මාළුව කිව්වම මට නිකංම මතක් වෙන්නේ වෙන දෙයක් නෙවෙයි ‘ඉඳි ආප්ප“....

අපේ තාත්තා අපි පුංචිකාලේ ගෙදර තේ කඩේකුත් කලා නෙව... ඒ දවස්වල තාත්තා උදේට ඉඳි ආප්ප.. තෝසේ වගේ දේවල් හදලා විකුණනවා... අහල පහල බොහෝමයක් දෙනා උදේට පෝලිමේ ඉන්නේ ඉදි ආප්ප ගෙනියන්න... ඔය දැන් කඩේ තියෙන හුළඟට ගහං යන ජාතියේ ඉඳි ආප්ප නෙවෙයි ඒවා බොහෝම සරුසාර ඉඳි ආප්ප.. අනික පාන් පිටි ඉඳි ආප්ප... දැන්නං හැම තැනම තියෙන්නේ හාල් පිටි ඉදි ආප්ප නෙව... හාල් පිටි ඉඳි ආප්ප සුදු පාටට තිබුනට මටනං ඇත්තටම ඒ හැටි අල්ලන කෑමක් නෙවෙයි... තම්බපු පිටි වලට ලුනු වතුර ටිකක් එක්කාසු කොරලා... හුමාලේ යන්න ඇරලා උණු වතුරින් අනා ගත්ත ගමන්ම පිටි වල එන්නේ අපූරු සුවඳක්.. එතැන ඉඳන්ම ඉඳි ආප්ප තැම්බෙනකල් බලං ඉන්න එකත් එපා වෙන වැඩක්...

එහෙම හදාගත්තු ඉඳි ආප්ප වලට අපේ තාත්තා එහෙමත් දවසක තමා පරිප්පු හරි අල හොද්දක් හරි හදන්නේ... දැන්නං මිනිස්සුන්ට ඉඳි ආප්ප කිව්වම කිරි හොදිනේ මතක් වෙන්නේ... ඒත් අපේ තාත්තගේ ආහාර රටාව එයිට වෙනස්... කඩේ විකුණන ඉඳි ආප්ප මුලට උනත් පොල් සම්බෝල ඇරුනම මාළුට දෙන්නේ එක එක ජාතියේ වෑංජන... පොළොස් පැහි... කෙසෙල් මුහ මාළුව... කොහිළ දළු වෑංජනේ.. කැබැල්ල දළු වෑංජනේ.. බිලිං මාළුව... අලයි හාල් මැස්සොයි හින්දවලා උයලා... ආන්න ඒවා එක්ක තමා තාත්තා තවාපු කෙසෙල් කොලෙන් හරි..වියළි කෙහෙල් කොළවල හරි ඉඳි ආප්ප මුල් බඳින්නේ... උදේට කට්ටිය පෝලිමේ එන්නේ තාත්තා අතින් හැදෙන ඒ වෑංජන එක්ක ඉඳි ආප්ප කන්න හුරු වෙච්ච සැට් එක තමා... උදේ පාන්දරම බාන ඉදි ආප්ප වලින් මුල්ම ඉඳි ආප්ප ටික ලිප ගාවට වෙලාම ගිල දාන් හින්දා මිස වැරදිලාවත් අට නවය වෙලා කන්න හිටියොත්නං ඉදි ආප්ප හොයනවා බොරු... සමහරු ඇවිත් හට්ටියත් පිහගෙන කාලා යන්නේ... ඒ තරමට ඒ දවස්වල අපේ තේ කඩේ ඉඳි ආප්ප මාකට් වෙලා තිබුනේ...

ඉතිං ඒ කාලේ එහෙම කෑවට මොකද පස්සෙන් පහු එහෙමත් වෙලාවකට තමා ඉඳි ආප්ප ටිකක් ඒ විදියට කන්න ලැබුනේ.. කොටින්ම මං කාලයක් ඉඳි ආප්ප කන එක නවත්තලා දාලාම තිබුනා.. ඒකට හේතුව උනේ හොඳ පුසුඹ ගහන පාන් පිටි ඉඳි ආප්ප දැන් හොයන්න ලේසි නැති එක.. අනිත් කාරනේ තමා කිරි හොඳි..පරිප්පු හොදි එක්ක ඉඳි ආප්ප කාලා කවදාවත් අර රසේ ගන්න බැහැ කියලා දැන දැන නිකං හිත නරක් කරගෙන ඕවා කන්න බැරි වීම...

ඒත් ඉතිං ආයේ ඕවා හදලා දෙන්න තාත්තා ඉන්නවා කියලෑ... ඉතිං කාලයක් තිස්සේ තාත්තාගේ ආහාර ගැලපීමේ රටාව මතක තියං ඉඳලා..උයන පිහන වෙලාවට ඒ රටාවට උයාගෙන පිහාගෙන කන එක මගේ පුරුද්ද උනත් බිලිං මාළුවක් එක්ක.. කැබැල්ල දළු ටිකක් එක්ක ඉඳි ආප්ප ටිකක් කන එක මගේ හිතේ කාලයක් තිස්සේ තිබුන ආසාවක්... ඔන්න කාරණේ...

පොළොස් ටිකක් එක්ක... කොහිළ දළු එක්ක පහුගිය කාලේ මං ඉඳි ආප්ප හදාගෙන කෑවා... ඒත්  උවමනාව තිබුනත් බිලිං ටිකක්... කැබැල්ල දළු ටිකක් ලේසියකට හම්බ වෙන එකක්යෑ... ආන්න එහෙම කාලයක් තිස්සේ මං ඇගිලි ගැන ගැන හිටියට වැඩේ ගොඩ දාගන්න උනේ නැහැ...අනුමානෙට වගේ කල්පනා කොරලා බැළුවොත් එක දහස් නවසිය අනූ අටෙන් පස්සේ.. ඒ කියන්නේ අවුරුදු පාලොහකින් විතර මට බිලිං මාළුවක් එක්ක ඉඳි ආප්පයක් කන්න වෙලා නැහැ...

ඉතිං පින්වතුනි... මෙහෙම තත්වයක් තියෙන කොට... කොහොම හරි  බිලිං ටිකක් හම්බ උන වෙලේ වැඩ වැඩියි කියලා නිකං හිටියැකිද...? ඔන්න කොලා වැඩේ...

ඇත්තම කිව්වොත් ආවේ බිලිං වෑංජනේ හදන හැටි පින්තූරත් එක්කලාම දාන්න කියලා.. ඒත් වැල් වටාරං ගහං එද්දී මේක දිග වැඩි වෙලා.. ඊ ළග පෝස්ටුවෙන් බැරියෑ ඒක දාන්න...